PIDARTA
PERPISAHAN
A.
Sambutan
Wakil Kelas III
Om Swastiastu,
Inggih ndawegang majeng
ring :
·
Bapak Kepala Sekolah
·
Para Dewan Guru
·
Para Pegawe sane baktinin titian
·
Miwah para semeton sane sihin titiang.
Titiang
pinake wakil saking kelas III, ri kenjekane mangkin titiang sareng sami rumasa
sedih saha kangen, saantukan titiang jagi ninggal Bapak-bapak, Ibu-ibu miwah
para semeton titiang sinamian. Tigang warsa sampun titiang ngiring Bapak-bapak,
Ibu-ibu miwah para semeton titiang iriki nandang suka-duka, manawita makeh
sampun kaiwangan-kaiwangan titiange majeng ring Bapak-bapak, Ibu-ibu miwah para
semeton titiang sinamian. Ri antuk punika titiang sareng sami nunas geng rena
sinampura pisan.
Majeng
ring para naben titiang, sane sampun ledang sueca ngicenin titiang paplajahan
pradene prasida sakadi mangkin, tan lali titiang ngaturang suksema banget, saha
ngastitiang ring Ida Sang Hyang Widhi Wasa, mugi-mugi Ida parama ledang
ngicenin kasubagan, dirga ayu dirga yusa.
Inggih
mangkin jagi tibakang titiang ring para sameton titiang kelas I miwah kelas II
ring sajeroning sekolah puniki, titiang taler meled jagi matingetang amatra,
sampunang lenga nampenin paplajahan miwah piteket-piteket sane dahating utama.
Sapituduh guru patut laksanaang, saantukan guru punika patut katiru miwah
kagega.
Inggih,
wantah asapunika prasida antuk titiang matur-atur, mugi-mugi sami-sami
ngledangin. Makawasana titiang ngaturang parama santi,
Om
Santih, Santih, Santih Om..
A.
Sambutan
Wakil Kelas I dan II
Sadurung titiang
matur-atur amatra, pinih riin titiang ngaturang puspa panganjali.
Om Swastiastu,
Bapak-bapak,
Ibu-ibu miwah para sameton sane banget baktinin titiang, minakadi para mitran
titiang kelas III, titiang pinaka wakil saking kelas I miwah kelas II, ri
kenjekan mangkin titiang taler rumasa sedih saha marasa kaicalan, saantukan
jagi katinggal, mapasahan ngawitin rainane mangkin.
Indik
piteket-piteket sane katibakang ring titiang, mugi-mugi titiang sareng sami
prasida antuk nglaksanaang. Ri antuk punika tan lali taler titiang ngaturang
suksema banget saha pangapti mugi-mugi para sameton sinamian mrasidayang
nglanturang sekolah, minakadi kaperguruan tinggi. Sane tan mrasidayang
nglanturang sekolah sampunang sungkan kayun, rereh kaweruhan sane marupa
katrampilan anggen srana jagi ngrereh pangupajiwa.
Lianan ring
punika taler tan lali titiang nunas geng rena sinampura, yan pade wenten
makaiwang-iwang titiang sane sampun lintang.
Inggih wantah
asapunika atur piuning titiang, makatuna langkung antuk titiang ngaturang,
malih apisan titiang nunas pangampura.
Om
Santih, Santih, Santih OM…
Sumber Pustaka:
Tinggen, I Nengah. 1993. Aneka Rupa Pidarta Bali (Pragmatis Bali).
Singaraja: Rhika Dewata.
No comments:
Post a Comment